Швейцария мен Венгрия құрамалары Еуро додасында топтық кезеңінің бірінші турындағы ойынын өткізді.
Кельндегі «Рейн-Энерги» стадионында өткен «А» тобындағы кездесу 3:1 есебімен швейцариялықтардың пайдасына аяқталды. Мурат Якин шәкірттері 12-минутта Квадво Дуа соққан жылдам голмен есеп ашты. Швейцариялықтар одан әрі басымдықты қолдан бермей, үзіліске дейін Мишель Эбишер (45 минут) әдемі соққымен көзге түсті – 2:0. Венгриялықтар жағдайды түзетуге тырысты. 66-минутта Барнабас Варга Ян Зоммер қақпасын дәл көздеді. Дегенмен, Швейцария құрамасынан Брилл Эмболо ойынның 93-минутында гол соғып, кездесудің нүктесін қойды.
Айта кетейік, 67-минутта «Астананың» бұрынғы жартылай қорғаушысы Ласло Кляйнхаслер Венгрия құрамасы сапынан алаңға шықты.
Осылайша, бірінші турдан кейін алғашқы кездесуде Шотландияны 5:1 есебімен жеңген Германия құрамасы А тобында көш бастады. Қосымша көрсеткіштер бойынша екінші аралық орынды швейцариялықтар алады. Венгрия мен Шотландия құрамаларында әлі ұпай жоқ.
19 маусымда екінші турда Штутгартта Германия мен Венгрия, ал сол күні Кельн қаласында Шотландия мен Швейцария кездеседі.
