Таиландта өткен бокстан Азия чемпионаты мәресіне жетті. Бүгін финалдық бәсекеде тоғыз боксшымыздан алғашқы болып шаршы алаңға шыққан Санжар Тәшкенбай өзбекстандық Шодиержон Меликузиевтен жеңіліп қалды.
Ал Махмұд Сабырхан Шахзод Музафаровты жеңіп, алтыннан алқа тақты.
Оразбек Асылқұлов Миразибек Мирзахалиловке есе жіберіп, күміс медаль еншіледі. Дулат Бекбауов, Диас Молжігітов, Абылайхан Жүсіпов те өзбек боксшыларына жол берді.
Бекзат Нұрдаулетов Жасурбек Юлдошевтен айласын асырып, Азия чемпионы атанды. Сағындық Тоғамбай тәжікстандық Парвиз Каримовты жеңді. Ал Ұлттық құрама капитаны Айбек Оралбай шешуші жекпе-жекте қытайлық Ремула Абдурекситиді жеңіп, ел қоржынын тағы бір алтын жүлдемен толықтырды.
Осылайша 4 алтын, 5 күміс, 1 қола медальмен құрамамыз жалпы есепте екінші орынға ие болды. Әдеттегідей, Өзбекстан құрамасы көш басында – 8 алтын, 2 күміс, 1 қола медаль.
