16 жастағы Омарханов жасөспірімдер арасындағы Аустралия ашық біріншілігінің алғашқы айналымында тамаша жеңіске жетті.
Жарыстың алғашқы кезеңінде қазақстандық теннисші турнирдің бірінші ракеткасы болып тіркелген италиялық Федерико Чиноймен сынға түсті. Матч 0:6, 6:3, 6:3 есебімен аяқталды. Бұл Әмірдің Федериконы екінші рет жеңуі. Қос теннисші арасындағы алғашқы кездесу 2023 жылдың қарашасында жасөспірімдер арасындағы Дэвис кубогының финалдық кезеңінде өткен болатын.
Айта кетейік, Омарханов жасөспірімдер арасындағы әлемдік рейтингте 26-шы орында. Ол Петр Нестеровтың жетекшілігімен жаттыққан, Қарағанды теннис мектебінің түлегі. Әмір қазір Белградтағы Янко Типсаревич академиясында шеберлігігін шыңдауда. Қазақстандық теннисшіні Неманья Лалич жаттықтырады. Ол ITF Juniors турнирлерінде жекелей және жұптық сайыстарда 5 рет жеңіске жеткен.
Сонымен қатар бірнеше қазақстандық теннисші іріктеу кезеңіне қатысқан болатын. Даниал Рахматуллаев күтпеген жерден румыниялық Стефан Хейттен 4:6, 5:7 есебімен жеңіліп қалды. Ал Виталий Зацепин іріктеу турнирінің алғашқы кезеңінен әрі аса алмады. Оны аустралиялық теннисші Зейн Стивенс жеңді — 3:6, 3:6.
Қыздар арасында Соня Жиенбаева Қазақстан атынан өнер көрсетті. Өкінішке қарай ол аустралиялық Алана Субашичтен жеңіліп қалды – 3:6, 6:1, 4:6.
Ал ертең, 21 қаңтарда Астана уақытымен сағат 8:00-де жасөспірімдер арасында Аустралия ашық біріншілігінің негізгі кезеңінде, 1/32 финал аясында 17 жасар Алматы теннис мектебінің түлегі Асылжан Арыстанбекова өнер көрсетеді. Ол әлемдік жасөспірімдер рейтингінде 68-ші орында. Жекелей сында қазақстандық жас теннисші бір титулға қол жеткізсе, жұптық сайыста ITF Juniors турнирлерінде 13 жүлде иеленді.
