Жәнібек Әлімханұлы WBO ұйымына апелляциялық шағым түсірді
2025 жылы желтоқсан айында допинг дауына байланысты Жәнібек Әлімханұлы бір жылға бокстан шеттетілген болатын.
жеке парақшасынан
Орта салмақтағы әлем чемпионы Жәнібек Әлімханұлы рингке оралу үдерісін жеделдету мақсатында ресми шаралар қабылдады. Оның командасы World Boxing Organization ұйымына апелляция жолдап, қолданыстағы дисквалификация мерзімін қысқарту немесе толықтай жою мәселесін қарастыруды сұрады. Бұл туралы Boxing-social.com хабарлады.
Қазіргі уақытта Жәнібек WBO нұсқасы бойынша орта салмақтағы чемпиондық атағын сақтап отыр. Ол өткен жылдың желтоқсан айында жоспарланған WBA чемпионы Эрисланди Лараға қарсы жекпе-жек қарсаңында сынамасы мельдонийге оң нәтиже көрсетуіне байланысты белгіленген дисквалификация мерзімін өтеп жатыр. Аталған шектеу ағымдағы жылдың желтоқсан айына дейін күшінде.
Осы жағдайға байланысты жоспарланған жекпе-жек өткізілмей қалды. Нәтижесінде Жәнібек International Boxing Federation нұсқасы бойынша әлем чемпионы атағынан айырылып, біріккен чемпион мәртебесін жоғалтты. Соған қарамастан, ол WBO чемпионы ретінде өз мәртебесін сақтап қалды.
Густаво Оливьеридің мәлімдеуінше, апелляция қазіргі таңда ұйымның тиісті құрылымдары тарапынан қаралу үстінде. Боксшы мен оның өкілдері қабылданған шешіммен келіспейтінін білдіріп, оны қайта қарау жөніндегі құқықтарын пайдалануда.
Қазіргі уақытта апелляция бойынша қабылданатын түпкілікті шешім күтілуде. Бұл шешім орта салмақтағы жағдайға ықпал етуі мүмкін.
