Хоккейден Қазақстан жастар құрамасы элиталық дивизионға шыға алмады
Бүгін Қазақстан құрамасы Швейцарияға минималды есеппен жол берді.
icehockey
Жасөспірімдер арасындағы әлем чемпионатының І дивизионы, А тобындағы шешуші матчта Қазақстан құрамасы Швейцарияға жол беріп, элиталық дивизионға шығу мүмкіндігінен айырылды.
Кездесу тағдыры алғашқы кезеңде шешілді. Швейцариялық хоккейшілер бірден қарқын қосып, бірінші кезеңде-ақ қатарынан үш шайба соқты. Қазақстандықтар тек бір голмен жауап беріп, үзіліске 1:3 есебімен кетті. Кейінгі екі кезеңде отандастарымыз шабуылды үдетіп, есеп айырмасын қысқартқанымен, таразы басын теңестіре алмады - 2:3.
Осылайша, төрт матчтан кейін 12 ұпай жинаған Швейцария турнир кестесінде жеке-дара көш бастап, жоғары дивизионға жолдама алды. Ал Қазақстан құрамасы 9 ұпаймен екінші орынға тұрақтап, элитаға шығу мүмкіндігін уысынан шығарып алды.
Айта кетейік, бұған дейін қазақстандық жасөспірімдер Венгрияны 5:2, Польшаны 10:2 және Украинаны 5:3 есебімен жеңген болатын.
Енді Максим Худяков шәкірттері турнирдегі соңғы ойынын 24 сәуір күні Словенияға қарсы өткізеді. Топтағы соңғы орын алған команда төменгі дивизионға түседі.
