Алуа Балқыбекова ширек финалда, Мұхамедсабыр Базарбайұлы жарыспен қош айтысты
16 қазақстандық былғары қолғап шебері Фос-ду-Игуасу қаласында әлем кубогында сынға түсуде.
olympic.kz
Бразилияда өтіп жатқан әлем кубогының алғашқы кезеңінде Қазақстан боксшыларының кезекті кездесулері өтті. Бүгінгі күннің басты жаңалығы - 51 келіде өнер көрсететін екі дүркін әлем чемпионы Алуа Балқыбекова ширек финалға жолдама алды.
1/8 финалда ол болгариялық Златислава Чукановамен қолғап түйістірді. Үш раунд бойы қарсыласы белсенді шабуылда болғанымен, Балқыбекова суыққанды тактика ұстанып, арақашықтықты дәл сақтады. Қарымта шабуылда сәтті қимылдаған қазақстандық боксшы төрешілердің шешімімен 4:1 есебімен жеңіске жетті.
Енді ширек финалда Алуа Балқыбекова ирландиялық Даяна Мурхаузпен кездеседі. Бұл жекпе-жек ертең өтеді.
Ал 65 келіде сынға түскен Мұхаммедсабыр Базарбайұлы үшін турнир аяқталды. Ол 1/8 финалда франциялық Хуго Грауға қарсы шықты. Жекпе-жек өте тартысты өтті. Қазақстандық спортшы қысқа қашықтықта белсенді әрекет етсе, қарсыласы алыс дистанцияда қарымта соққыларға иек артты. Нәтижесінде төрешілер шешімімен 3:2 есебімен Грау жеңіске жетті.
Айта кетейік, түнгі сессияда бүгін Қазақстан уақытымен 01:00-де Аида Әбікеева чехиялық Виктория Жилковаға қарсы жекпе-жек өткізеді.
