«Астана» «Қызылжардан» үш ұпай алды
Елордалық «Астана» Қазақстан Премьер-лигасының тоғызыншы турында петропавлдық «Қызылжарды» жеңді.
"Астана" ФК
«Астана Аренада» «Астана» мен «Қызылжар» арасында өткен кездесу 2:1 есебімен алаң иелерінің жеңісімен аяқталды.
47-минутта «Астананың» бұрынғы ойыншысы Юрий Перцух айып алаңы шетінен асырылған пасты қақпаға дәл бағыттап, есеп ашты.
Алайда елордалық клуб көп ұзамай таразы басын теңестірді. 54-минутта Ян Вороговский есепті теңестірсе, төрт минуттан кейін Карло Бартолец жеңіс голын соқты.
Кездесудің соңына қарай петропавлдық команда бір ойыншыға кем қалды. 89-минутта Кот-д’Ивуарлық шабуылшы Этьен Бугре екінші сары қағазын алып, алаңнан қуылды. Осылайша матч 2:1 есебімен елордалықтардың пайдасына аяқталды.
Осы жеңістің арқасында «Астана» 15 ұпай жинап, турнир кестесінде төртінші орынға көтерілді. Ал «Қызылжар» 11 ұпаймен тоғызыншы сатыда қалып отыр.
