Ғалымжан Кенжебек Ресей премьер-лигасындағы алғашқы голын салды
Бүгін «Ахмат» сапында қос қазақстандық футболшы алаңға шықты.
Ахмат ФК
Қазақстан құрамасының футболшысы Ғалымжан Кенжебек Ресей премьер-лигасының 29-турында маңызды гол авторы атанды. Грозныйдың «Ахмат» клубы өз алаңында Махачкаланың «Динамосымен» кездесіп, 1:1 есебімен тең түсті.
Матчтың алғашқы бөлігінде қонақтар басым болды. 38-минутта қорғаушы Мохамед Аззи мергендік танытып, махачкалалық ұжымды алға шығарды.
Үзілістен кейін «Ахмат» шабуылды үдетіп, құрамға өзгерістер енгізді. 60-минутта алаңға Қазақстан құрамасының вингері Ғалымжан Кенжебек шығып, белсенді ойынымен көзге түсті. Ол отандасы Максим Самородовтың орнына ойынға қосылды.
83-минутта Кенжебек шабуылды сәтті аяқтап, «Ахмат» сапындағы алғашқы голын соқты. Осылайша қазақстандық футболшы командасын жеңілістен құтқарып, матчтың басты қаһармандарының біріне айналды.
