Холанд пен Кейн текетіресі: Норвегия мен Англия ширек финалда кім мықтыны анықтайды
Әлем чемпионатының 1/4 финалдық матчы 12-шілдеге жоспарланған.
2026 жылғы футболдан әлем чемпионатының ширек финалында Норвегия мен Англия құрамалары кездеседі. Бұл матчтың басты интригасы - турнирдің үздік сұрмергені атағына үміткер Эрлинг Холанд пен Харри Кейннің бетпе-бет келуі.
Норвегия құрамасы өз тарихында алғаш рет әлем чемпионатының ширек финалына шықты. Скандинавиялықтар топтық кезеңде Иракты (4:1) және Сенегалды (3:2), ал плей-оффта Кот-д’Ивуарды (2:1) және Бразилияны (2:1) жеңді. Әсіресе бес дүркін әлем чемпиондарын жарыстан шығарған жеңіс команда үшін тарихи жетістік болды. Сол кездесуде қақпашы Эрьян Нюланд пенальти қайтарып, бірнеше маңызды сейв жасаса, Эрлинг Холанд дубль авторы атанып, ресми матчтардағы гол соғу сериясын 14 ойынға жеткізді.
Алайда Норвегия құрамасы кадрлық қиындықтарға тап болды. Қорғаушы Давид Меллер жарақат алса, шабуылшы Антонио Нусаның да алаңға шығуы күмәнді. Соған қарамастан, команда шабуылдағы қарқынының арқасында нәтижеге қол жеткізіп келеді. Норвегия соңғы 12 матчтың тек біреуінде ғана қақпасын голдан аман сақтап қалды. Бірақ бұл олардың жеңісіне көп кедергі келтірген жоқ.
Ал Англия құрамасы турнир барысында әрбір жеңісті үлкен еңбекпен алып жүр. Топтық кезеңде Хорватияны 4:2 есебімен сенімді ұтқанымен, кейін Ганамен тең түсіп, Панама, Конго Демократиялық Республикасы және Мексиканы қиындықпен жеңді. Бас бапкер Томас Тухельдің командасы қорғаныстағы жарақаттар мен дисквалификацияларға байланысты құрам мәселесіне тап болғанымен, шабуыл шебінде бәсекелестік жоғары деңгейде сақталып отыр.
Англияның басты үміті - бес матчта алты гол соққан Харри Кейн. Сонымен қатар Букайо Сака, Маркус Рэшфорд, Энтони Гордон және Нони Мадуэке секілді ойыншылар шабуылдағы қауіпті күшейтіп келеді.
Сарапшылардың пікірінше, бұл мүмкіндігі тең екі құраманың кездесуі. Екі команда да қорғаныста қателік жіберуге бейім болғанымен, шабуылда өте қауіпті. Сондықтан қос команда да жеңіске лайықты. Бұл матч 12-шілде Қазақстан уақытымен 1:50-де басталады.
