«Астана» соңғы минуттарда сүрініп, Еурокубоктағы жорығын аяқтады
Елордалық команда өз алаңында жеңіліс тапты.
ашық дереккөзден
Елордалық «Астана» УЕФА Конференциялар лигасының 2026/27 жылғы маусымындағы алғашқы іріктеу кезеңінен өте алмады. Қазақстандық клуб екі ойын қорытындысы бойынша Албанияның «Динамо Сити» командасына жол берді.
Алғашқы кездесуде сырт алаңда 1:0 есебімен жеңіске жеткен «Астана» қарымта матчта да жеңісті есепті сақтап қалуға тырысты. Елордалық команда өз алаңында өткен ойынды белсенді бастап, 23-минутта алға шықты. Айып алаңындағы ереже бұзылып, белгіленген пенальтиді Бауыржан Исламхан дәл орындап, команданы алға шығарды.
Бірақ екінші таймда жағдай қазақстандық клуб үшін күрделене түсті. 49-минутта қорғаушы Кипрас Казуколовас екінші сары қағаз алып, алаңнан қуылды. Бір ойыншыға кем қалған «Астана» көп ұзамай қарсыласына есепті теңестіруге мүмкіндік берді. 50-минутта Бруно Дита пенальтиден мүлт кетпей, таразы басын теңестірді.
Арада 12 минут өткенде Хекуран Бериша албаниялық клубты алға шығарды. Негізгі уақыт 2:1 есебімен аяқталып, қос матчтағы жалпы есеп тең болғандықтан, жеңімпаз қосымша уақытта анықталды.
Қосымша уақыт басталған бетте «Динамо Сити» басымдыққа ие болды. 93-минутта Лоренцо Вила үшінші голды соқса, кездесудің соңғы сәттерінде қонақтар тағы бір мәрте мергендік танытып, есепті 4:1-ге жеткізді.
Осылайша, екі матчтың қорытындысы бойынша «Динамо Сити» 4:2 есебімен басым түсіп, Конференциялар лигасының екінші іріктеу кезеңіне өтті.
Ал «Астана» алғашқы кезеңде-ақ еурокубокпен қоштасты. Алғашқы ойындағы жеңісіне қарамастан, елордалық клуб қарымта кездесуде қажетті нәтижеге қол жеткізе алмады.
