«Торпедо» титулын қорғай ма? Қазақстан Кубогының күнтізбесі жарияланды
Финал 23-тамыз күні Қарағандыда өтеді.
ашық дереккөзден
Биыл ел кубогы үшін 10 команда таласады. Өткен маусымның қорытынды рейтингіне сәйкес қатысушылар екі топқа бөлінді.
А тобындағы кездесулер Өскеменде өтеді. Бұл топта ел чемпионы елордалық «Номад», жергілікті «Торпедо», көкшетаулық «Арлан», «Алматы» және «Ақтөбе» командалары өнер көрсетеді.
В тобының ойындарын Қарағанды қабылдайды. Бұл топта «Сарыарқа», петропавлдық «Құлагер», рудныйлық «Горняк», атыраулық «Бейбарыс» және павлодарлық «Ертіс» бақ сынайды.
Матчтар кестесіне сәйкес, турнир 14 тамызда басталады. Ашылу күні А тобында ел чемпионы «Номад» «Ақтөбемен» кездессе, кешкі сессияда Өскеменнің «Торпедосы» мен Көкшетаудың «Арланы» өзара мықтыны анықтайды. В тобында «Құлагер» - «Горняк» және «Сарыарқа» - «Ертіс» матчтары өтеді.
Топтық кезең ойындары 19 тамызға дейін жалғасады. Осы аралықта барлық командалар плей-офф жолдамалары үшін өзара кездесулер өткізеді.
Жартылай финалдар 22 тамызда Қарағандыда ұйымдастырылады. Бұл кезеңде В тобының жеңімпазы А тобының екінші орын алған командасымен, ал А тобының жеңімпазы В тобының екінші орын иегерімен кездеседі.
Турнирдің шешуші ойыны 23 тамызда өтеді. Финалда жеңіске жеткен команда 2026 жылғы Қазақстан Кубогының иегері атанады.
