Александр Бублик АҚШ ашық чемпионатын жеңіспен бастады
Нью-Йоркте US Open турнирі басталды.
ашық дереккөзден
Александр Бублик маусымдағы «Үлкен дулыға» турнирлерінің соңғысы - АҚШ ашық чемпионатындағы алғашқы кездесуін жеңіспен бастады.
Әлемдік рейтингте 16-орында тұрған қазақстандық теннисші бірінші айналымда әлемнің 253-ракеткасы, америкалық Джеффри Джон Волфпен кездесті. Волф турнир ұйымдастырушыларынан арнайы шақырту (wild card) алған.
Кездесу төрт сетке созылып, 6:4, 6:2, 3:6, 6:1 есебімен Бубликтің жеңісімен аяқталды.
Теннисшілер хард кортта 2 сағат 15 минут ойнады. Осы уақыт ішінде Бублик 18 эйс жасап, 10 рет қос қателік жіберді. Сондай-ақ қазақстандық теннисші өзі алған сегіз брейк-пойнттың жетеуін пайдаланды.
Бублик US Open турнирінің екінші айналымында аргентиналық Тьяго Агустин Тиранте мен француз Адриан Маннарино арасындағы кездесудің жеңімпазымен ойнайды.
