Алматыда World Tennis ұйымының Бас ассамблеясы өтеді
Бұл шара Орталық Азияда алғаш рет ұйымдастырылмақ.
ашық дереккөзден
10-13 қазан аралығында Алматыда World Tennis ұйымының жыл сайынғы Бас ассамблеясы өтеді. Ассамблеяға ұлттық федерациялардың басшылары мен өкілдері, халықаралық және құрлықтық теннис ұйымдарының мүшелері, сарапшылар мен серіктестер қатысады.
11-13 қазан күндері өтетін отырыстар мен жалпы дауыс беруге әлемнің 137 елінен 262-ден астам делегат қатысады деп жоспарланған. 10-11 қазанда World Tennis директорлар кеңесінің отырыстары өтеді. Ал 13 қазанда ассамблеяның негізгі отырысында әлемдік теннистің алдағы дамуына қатысты маңызды шешімдер қабылданады. Бас ассамблеяның Алматыда өтуі - Қазақстанға халықаралық теннис қауымдастығының жоғары сенімін көрсетеді.
Жиын барысында теннисті қолжетімді ету, балалар мен жасөспірімдер теннисін дамыту, спорт инфрақұрылымын жетілдіру, жаттықтырушылар мен төрешілерді даярлау және халықаралық жарыстарды өткізу мәселелері талқыланады.
