Бек Нұрмағанбет Канелоның бокс кешінде жұдырықтасады
Бек Нұрмағанбет Канелоның тұрақты спарринг-серіктестерінің бірі.
ашық дереккөзден
Қазақстандық кәсіпқой боксшы Бек Нұрмағанбет 31 қазанда Сауд Арабиясының Эр-Рияд қаласында өтетін бокс кешінде өнер көрсетеді.
Екінші орта салмақта жұдырықтасатын отандасымыздың жекпе-жегі мексикалық Сауль «Канело» Альварес (63-3-2, 39 KO) пен Кристиан Мбилли (29-0-1, 24 KO) арасындағы басты кездесудің андеркардында үшінші болып өтеді.
«Мексика әлемге қарсы» форматында ұйымдастырылатын бокс кешінде Бек Нұрмағанбеттің қарсыласы 37 жастағы мексикалық боксшы Маркос Васкес (21-3-1, 10 KO) болмақ.
«Жақында менің кезекті жекпе-жегім өтеді. 31 қазан күні Маркос Васкеске қарсы рингке шығамын. Бұл мен үшін маңызды кезең және алға қарай тағы бір қадам. Алда маңызды жекпе-жек күтіп тұр. Оған бар күшімді салып дайындалып жатырмын.
Мені қолдап, сенім білдіріп жүрген баршаңызға рақмет! Қазақстан, қолдауларыңызды күтемін! Рингте кездескенше!» - деді Бек Нұрмағанбет Instagram парақшасында.
Айта кетейік, Бек Нұрмағанбет Канелоның тұрақты спарринг-серіктестерінің бірі. Қазақстандық боксшының мүддесін Canelo Promotions компаниясы қорғайды. Оның менеджері Канелоның жаттықтырушысы әрі менеджері Эдди Рейносо.
