Айбек Айтбеков пен Юсуф Ашрапов U23 әлем чемпионатының финалында белдеседі
Алтын медаль үшін белдесулер 14 қазан күні Қазақстан уақытымен сағат 06:00-де басталады.
ашық дереккөзден
АҚШ-тың Лас-Вегас қаласында өтіп жатқан 23 жасқа дейінгі балуандар арасындағы әлем чемпионатында грек-рим күресінен Қазақстан құрамасының екі өкілі финалға жолдама алды.
60 келіге дейінгі салмақ дәрежесінде сынға түскен Айбек Айтбеков жартылай финалда украиналық Евгений Поковбаны 5:4 есебімен жеңді. Осылайша, отандасымыз алтын медаль үшін белдесуге мүмкіндік алды.
Айбек жарысты 1/16 финалдан бастап, грузиялық Гиорги Кочалидзені 9:5 есебімен ұтты. Одан кейін Ресей атынан өнер көрсететін, әлем чемпионаттарының екі дүркін жүлдегері Әлібек Амировты 9:0 есебімен мерзімінен бұрын жеңді. Ширек финалда жапониялық Сейма Токухарадан 7:3 есебімен басым түсті.
Финалда қазақстандық балуан қазіргі әлем чемпионы, әзербайжандық Эльмир Әлиевпен кездеседі.
72 келіге дейінгі салмақта Юсуф Ашрапов та финалға шықты. Ол жартылай финалда түркиялық Ибрагим Өздемирді 5:0 есебімен жеңіп, белдесуді алғашқы минутқа жеткізбей аяқтады.
Финалда Юсуфтың қарсыласы армениялық Гаспар Тертерян болмақ.
Осылайша, Қазақстан құрамасының екі балуаны да әлем чемпионатының алтын медалі үшін күреседі.
