Қасым-Жомарт Тоқаев World Aquatics президентін марапаттады
Президент елімізде су спортына қызығушылық артып келе жатқанын атап өтті.
Ақорда
Мемлекет басшысы Қасым-Жомарт Тоқаев бүгін World Aquatics халықаралық су спорты федерациясының президенті Хусейн Әл-Мусалламды қабылдады.
Кездесу барысында Мемлекет басшысы ұйымның Қазақстан су спорты түрлері федерациясына көрсетіп келе жатқан қолдауын жоғары бағалап, ынтымақтастықты одан әрі нығайтуға мүдделі екенін жеткізді.
Сондай-ақ Қазақстанда бұқаралық және кәсіби спортты дамытуға, халықаралық жарыстар өткізуге және спорт инфрақұрылымын жетілдіруге басымдық беріліп отырғанын айтты.
Хусейн Әл-Мусаллам қазақстандық спортшылардың жетістіктері елдің спорт саласын дамытуда әлеуеті зор екенін көрсететінін атап өтті.
Кездесу соңында Қасым-Жомарт Тоқаев су спорты түрлерін дамытуға қосқан үлесі үшін World Aquatics президентін ІІ дәрежелі «Достық» орденімен марапаттады.
