«Қайрат» пен «Рига» тең тарқасты
Темірлан Анарбеков «Рига» - «Қайрат» матчының үздік ойыншысы атанды
ашық дереккөзден
Алматылық «Қайрат» Конференция лигасының жалпы кезеңіндегі алғашқы матчында латвиялық «Ригамен» 1:1 есебімен тең түсті. Кездесу Рига қаласында өтті.
Ойынның 5-минутында Марк Гуаль пенальтиден есеп ашты. Алайда жеті минуттан кейін Салах Улад таразы басын теңестірді. Ал 29-минутта «Рига» тағы бір пенальти орындау мүмкіндігіне ие болды. Дегенмен «Қайрат» қақпашысы Темірлан Анарбеков Мухаммед Бадамосидің соққысын қайтарып, командасын голдан құтқарды.
Екінші таймда қос команда да жеңіс голын соғуға тырысқанымен, есеп өзгеріссіз қалды.
Матчтан кейін SofaScore статистикалық порталы ойыншылардың бағаларын жариялады. Темірлан Анарбеков 8,6 ұпай алып, кездесудің үздік ойыншысы атанды. Оның шешуші сәтте пенальтиді қайтаруы «Қайратқа» сырт алаңда бір ұпай иеленуге көмектесті.
Айта кетейік, «Қайрат» жалпы кезеңде грекиялық «Панатинаикос», италиялық «Аталанта», швециялық «Мьельбю», румыниялық «Университатя Крайова» және нидерландылық «Твенте» командаларымен де кездеседі.
