Балауса Мұздиман (5-0, 4 КО) кәсіпқой мансабында тамаша жетістікке жетті. Ол WBA Asia тұжырымы бойынша жеңіл салмақта чемпион атанды. Жеңіліс көрмеген қазақстандық былғары қолғап шебері Таиландта жергілікті боксшы Джиттамат Пхомтамен (5-4, 3 КО) кездесті. Беделді белбеу үшін өткен жекпе-жек мерзімінен бұрын аяқталып, Мұздиман бірінші раундта техникалық нокаутпен жеңіске жетті.
Бұл Балаусаның кәсіпқой мансабындағы бесінші жеңісі болды. Оның төртеуін нокаутпен жеңді. Қарсыласы Джиттамат Пхомта мансабында бесінші мәрте жеңіліс тапты.
Мұздиманның кәсіпқой бокстағы жолы 2017 жылы басталған. Алайда, дебюттік жекпе-жегінен кейін мансабында ұзақ үзіліс болып, қазақстандық спортшы алты жыл бойы рингке шықпады. Балауса 2023 жылдың наурыз айында рингке оралды және содан бері тамаша нәтиже көрсетіп келеді.
