14-28 қаңтар аралығында Мельбурн қаласында (Аустралия) жаңа маусымдағы бірінші «Үлкен дулыға» турнирі – Australian Open 2024 өтеді.
11 қаңтарда ерлер мен әйелдер арасындағы жекелей сында турнирдің жеребе тарту рәсімі өтті. Қазақстанның үш өкілінің қарсыластары белгілі. Әйелдер арасындағы жекелей турнирдің 128 қатысушысының тізімінде екі қазақстандық — әлемнің үшінші ракеткасы Елена Рыбакина мен рейтингте 64-ші орындағы Юлия Путинцева бар. Ерлер арасындағы турнирде ел намысын әлемдік классификацияда 31-орында тұрған Александр Бублик қана қорғайды.
Ерлер арасындағы турнирде іріктеу арқылы негізгі кезеңге үш қазақстандық теннисші мүмкіндік алды. Бірақ, Денис Евсеев пен Тимофей Скатов іріктеу кезеңінің бірінші кезеңінде жеңіліп қалды. Ал Бейбіт Жұқаев жартылай финалға дейін жетіп, әлемнің 99-шы ракеткасы француз Уго Гастонға есе жіберді – 6:7 (3), 3:6.
26 жастағы Бублик пен 29 жастағы Путинцева бірінші айналымда кіммен ойнайтынын әлі белгіісіз. Өйткені, екеуі де іріктеу турнирінің жеңімпаздарының бірімен кездесуі керек. Жеребе бойынша Александр мен Юлияға кім қарсылас атанатынын болжау мүмкін емес. Себебі 30-дан астам теннисші іріктеуге қатысатын теннисшілер тізімінде бар.
Дегенмен, бұл 100 үздік ойыншы қатарынан болмайтыны анық. Кем дегенде, үздік жүздіктің екі теннисшісі – чилилік Томас Барриос Вера (№ 95) мен Жуқаевтың қарсыласы болған Гастон (No 99) ерлер турнирінің негізгі жеребесіне шығуға үміттеніп отыр. Жарыстың негізгі жеребесіне шығу үшін екеуі де бір матчта жеңіске жетуі керек.
Әлемнің екінші ракеткасы испаниялық Карлос Алькарас үшінші айналымда Бубликпен кездесуі мүмкін. Турнирдің жеребесі Александр үшін бірінші кезеңде жеңіске жетсе, екінші айналымда америкалық Маккензи Макдональд (№ 42) пен қытайлық Цзюнчэн Шан (№ 142) арасындағы кездесудің жеңімпазымен ойнайды. Оның үстіне Цзюнчэн Шан Аустралия ашық чемпионатын ұйымдастырушылардан шақырту (Wild Card алды — рейтинг бойынша өзі негізгі кезеңге жолдама ала алмады.
Елена Рыбакина бірінші айналымда 31 жастағы чехиялық Каролина Плишковамен ойнайды. Қазір ол рейтингте 37-орында тұр. Ал 2017 жылы ол тіпті әлемнің үздік теннисшісі болды. Рас, әлемнің бұрынғы бірінші ракеткасы мәртебесіне қарамастан, Плишкова екі финалмен шектеліп, «Үлкен дулыға» турнирін жеңіп көрмеген. Мельбурн қаласында ол 2019 жылы жартылай финалға дейін ғана жеткен.
Елена мен Каролина бір-бірімен үш рет кездесіп, барлығында дап қазақстандық теннисші жеңіске жеткен. 2020 жылы Дубайда (БАӘ) 7:6(1), 6:3 есебімен, 2022 жылы Гвадалахарада (Мексика) дәл осындай есеппен жеңіске жетті — 7:6 (5), 6:2. Ал өткен жылы Абу-Дабиде (БАӘ) Рыбакина тағы да чехиялық теннисшіге бір сет те бермеді – 6:4, 6:2.
Көптеген сарапшылар Рыбакина мен Плишкованың теннис ойнау мәнерлерін ұқсас дейді. Сонымен бірге Елена Каролинаның жетілдірілген нұсқасы деген пікір жиі айтылады және олардың алдыңғы матчтарының нәтижелері, негізінен, бұл пікірді растайды.
Плишкова үшін Рыбакина өте ыңғайсыз қарсылас. Оның үстіне, қазір қазақстандық теннисші 2024 жылдың басталғалы бері алты рет қатарынан жеңіске жеткен. Маусым басында Каролина үш кездесудің бірінде ғана жеңіске жетті. Ол жақында декреттік демалыстан кейін теннис әлеміне қайта оралған Наоми Осаканы әрең жеңді. Ал Елена Остапенко мен оның отандасы Катерина Синяковадан жеңіліп қалды. Сондықтан алдағы текетірестің фавориті Елена Рыбакина екені сөзсіз.
