Бүгін, 28 шілде Парижде (Франция) өтіп жатқан Олимпиада ойындарында қазақстандық дзюдошы Ғұсман Қырғызбаев бесінші кездесуін өткізіп, жеңіске жетті. Ол 66 келіге дейінгі салмақ дәрежесінде сербиялық Страхиния Бунчичпен белдесіп, Париж Олимпиадасының қола жүлдегері атанды.
1/16 финалда қазақстандық дзюдошы испаниялық Давид Гарсиа Торнені ұтып, сенсация жасаған. Содан кейін оңтүстіккореялық Ан Ба Улден айласын асырды. Ширек финалда француз Валид Кхярды жеңді. Ал жартылай финалда Амандо Лимаға қарсы рингке шығып, бразилия өкіліне ұтылды. Дегенмен қола жүлде үшін белдесуде намысты қолдан бермеді.
Айта кетейік, қазақстандық спортшылардан тағы бір дзюдошы Елдос Сметов 2024 жылғы Олимпиадада Қазақстанға алғашқы алтын жүлде әкелді. Осылайша әзірге ел қоржынында үш медаль бар: алтын медаль — Елдос Сметов (дзюдо, 60 келі), қола медаль Александра Ле – Ислам Сатпаев (пневматикалық винтовкамен 10 метрге нысана көздеу, микст), қола медаль — Ғұсман Қырғызбаев (дзюдо, 66 келі).
