Әлемнің төртінші ракеткасы Елена Рыбакина жүлде қоры 800 мың еуродан асатын Берлинде (Германия) өтіп жатқан WTA 500 турнирінде алғашқы кездесуін өткізді.
Рыбакина екінші айналымда әлемнің 35-ші ракеткасы ресейлік Вероника Кудерметовамен кездесіп, екі сетте 6:4, 7:5 есебімен жеңіске жетті. Бұған дейін теннисшілер өзара төрт рет кездесіп, төрт кездесуде де қазақстандық теннисшінің пайдасына аяқталған.
Осылайша, Рыбакина ширек финалға шықты. Енді ол әлемнің бұрынғы бірінші ракеткасы беларусь қызы Виктория Азаренкамен сынға түседі.
Ал Қазақстанның екінші ракеткасы Юлия Путинцева Бирмингемдегі (Англия) турнирдің ширек финалына шықты. 1/8 финалда украиналық Ангелина Калининаны ұтты. Қазақстандық теннисші бірінші сетті 6:3 есебімен, екінші сетте 6:0 есебімен ұтты. Юлияның келесі қарсыласы Каролин Долхайд пен Элизе Мертенс арасындағы кездесудің жеңімпазы болмақ.
Естеріңізге сала кетейік, бірінші айналымда қазақстандық теннисші франциялық Клара Бюрельді 6:3, 6:4 есебімен ұтқан болатын.
