Екі қазақстандық хоккейші Солтүстік Американың жастар лигаларына шақырту алды. Осылайша, Қазақстан жастар құрамасының шабуылшысы Абзал Әлібек АҚШ-тың жасөспірімдер хоккей лигасы – USHL турнирінде өнер көрсететін Айова штатының Des Moines Buccaneers клубына ауысты.
Естеріңізге сала кетейік, хоккейші бұған дейін осы клубтың драфтында болған және биылғы маусымда жаңа лигада дебют жасайды. Абзал Әлібек биылғы 2024 жылғы әлем чемпионатында Қазақстан жастар құрамасы сапында элиталық дивизионда өнер көрсетіп, 5 кездесуге қатысып, 5 (2+3) ұпай жинады. Өткен маусымда ол «Снежные Барсы» командасында, сондай-ақ Қазақстан Жастар лигасында «Барыс» сапында ойнады.
Ал, шабуылшы Корней Корнеев QMJHL Квебек жасөспірімдер хоккей лигасында ойнайтын канадалық Sagueneens de Chicoutimi клубына ауысты. Форвард жастар арасындағы соңғы әлем чемпионатында да Қазақстан құрамасы сапында өнер көрсетіп, бес кездесуде 4 (2+2) ұпай жинады. Корней өткен маусымды Омбыда өткізді. Онда «Авангард U18» Ресей чемпионатындағы Сібір – Қиыр Шығыс аймағындағы өнер көрсетті.
