Қазақстан кубогі өтетін кезеңде «Номад» ойыншыларының көпшілігі ұлттық құраманың тамыздың соңында Братиславада өтетін Олимпиада іріктеуінің финалдық кезеңіне дайындалады. Осыған байланысты елордалық ұжым ҚР Кубогіне қатыса алмайды. Ал турнир топтарының қорытынды құрамы өзгеріске ұшырады.
Матчтары Өскеменде өтетін А тобында қазіргі ел чемпионы – көкшетаулық «Арлан», Кубоктің қазіргі жеңімпазы – ташкенттік «Хумо», «Торпедо», петропавлдық «Құлагер» мен «Алматы» бар. Қарағандыда өтетін В тобының тартысына «Сарыарқа», «Ақтөбе», рудныйлық «Горняк», атыраулық «Бейбарыс» және павлодарлық «Ертіс» қатысады.
Алдын ала кезеңнің кездесулері 23 және 28 тамыз аралығында өтеді. Әрі қарай плей-офф аясында жартылай финалдар (топ жеңімпаздары параллель топта екінші орын алған командалармен ойнайды) және финал өтеді. Шешуші матчтар Өскеменде 31 тамызда және 1 қыркүйекте өтеді деп жоспарланған.