Азия Олимпиада кеңесі мен Халықаралық бокс қауымдастығы өткен жылдың қазан айынан бері допингке қарсы ережелерді бұзғаны үшін спортпен айналысудан шеттетілген Моңғолия өкілі Батарсух Чинзоригқа қатысты үкім шығарды.
63,5 келіге дейінгі салмақта Азия ойындарында алтын медаль жеңіп алған Улан-Батор тумасы тыйым салынған Methandienone препаратын қолданып ұсталып, допинг сынамасынан өте алмай қалды. Дереу тергеу басталды. Алайда Азия Олимпиада кеңесі мен Халықаралық бокс қауымдастығы көптен күткен шешімді кеше, 27 қарашада ғана қабылдады.
33 жастағы Батарсух Чинзориг ресми түрде төрт жылға дисквалификацияланды. Осылайша, қазақ боксшысы Ертуған Зейнуллинов 2023 жылғы Азия ойындарының қола жүлдегері атанды. Өйткені 1/4-финалда ол Батарсух Чинзоригқа жеңілген болатын. Нәтижесінде қазір 2023 жылғы Азия ойындары бойынша біздің командада бес емес, алты медаль болды.
