Футзалдан Қазақстан құрамасы Әлем чемпионатының қожайыны – Өзбекстан құрамасымен екі жолдастық кездесу өткізеді.
Жолдастық кездесулер Өзбекстанда өтетін Әлем чемпионатына дайындық аясында болады. Матчтар 2024 жылдың 8 және 10 сәуірінде Ташкент қаласында өтеді. Соңғы рет 2021 жылы Астанада Қазақстан мен Өзбекстан құрамалары өзара екі жолдастық кездесу өткізген. Алғашқы ойын 3:1 есебімен ел құрамасының жеңісімен аяқталса, екінші матч 4:6 есебімен Өзбекстан футзалшылары жеңді.
Айта кетейік, күні кеше Кака шәкірттері сырт алаңда Румыниядан басым түскен болатын. Футзалдан Қазақстан ұлттық құрамасы 2024 жылғы әлем чемпионатының элиталық іріктеу матчында Румынияны 2:0 есебімен жеңді. Есепті ойынның 7-ші минутында Шыңғыс Есенаманов ашты. Екінші таймда Біржан Оразов екінші голды соғып, қорытынды есепті тіркеді.
Осылайша, Қазақстан құрамасы 2024 жылғы әлем чемпионатының іріктеу кезеңінің элиталы раундындағы барлық матчында жеңіске жетті. Өткен турда Каканың шәкірттері келер жылы өтетін әлем чемпионатына уақытынан ерте жолдамаға ие болды.
