Бүгін, 29 қыркүйек пен 5 қазан аралығында Шымкентте Кеңес Одағының батыры Қарақозы Әбдалиевті еске алуға арналған ерлер арасында халықаралық турнир өтеді. Жарысқа Қазақстанның барлық аймағынан және Украина, Түркия, Өзбекстан, Тәжікстан, Қырғызстан жүзден аса боксшы қатысады деп күтілуде.
Осымен 43ші рет өтетін беделді бәсекенің Қазақстан боксшылары үшін биыл орны бөлек болмақ. Себебі, дәл осы шаршы алаңда қараша айында Иорданияда өтетін Азия чемпионатына құрам іріктеледі.
Айта кетейік, 27 қыркүйек күні Қазақстан ҰОК мен Қазақстан бокс федерациясы кездесу өткізген болатын. Кездесуге ҰОК президенті Геннадий Головкин, бас хатшы Әлімжан Ақаев, ҚБФ басшысы Шахмұрат Мүтәліп, атқарушы директор Рауан Игенев, сондай-ақ, ерлер командасының бас бапкері Қайрат Сәтжанов пен Асқар Еркебаев қатысты.
ҰОК басшысы Франция астанасы Парижде өткен 2024 жылғы Олимпиада ойындарынан кейін алғаш рет Қазақстан құрмасының бапкерлер штабымен кездесті. Геннадий Головкин 2024 жылғы Олимпиадаға қатысқан боксшылардың қазіргі жағдайынан хабар алды.
Қарақозы Әбдәлиевті еске алуға арналған халықаралық турнир мен Қазақстан чемпионатына Ұлттық құрамаға іріктеу турнирі ретінде өтеді. Қайрат Сәтжанов пен Асқар Еркебаевтың айтуынша, бұл жарыстардың қорытындысы команданы жасақтауға тікелей әсер етеді.
