Астананың оң жағалауындағы Қажымұқан Мұңайтпасов атындағы жаңа стадионның құрылысының бюджеті белгілі болды. Елордадағы жаңа стадион Сарыарқа ауданындағы Кенесары көшесі, 14 мекенжайындағы ескі стадионның орнына салынады. Нысанның құрылыс алаңы 15 мың шаршы метрден асады.
«Тапсырыс беруші – «Астана қаласының құрылыс басқармасы»; сипаттамасы – Астана қаласы, Сарыарқа ауданы, көш. Кенесары, 14″; жоспарланған сома — 15 228 082 539,89 теңге», — делінген мемлекеттік сатып алу сайтында лоттың сипаттамасында.
24 қыркүйекте Индустрия және құрылыс министрлігі «Мемлекеттік сараптама» мемлекеттік кәсіпорны Қ.Мұңайтпасов атындағы стадион құрылысының жобалық құжаттамасын қарау нәтижесінде оң қорытынды бергенін хабарлады.
Мемлекеттік сатып алу сайтында өтінімдерді қабылдау 22 қазанда басталып, 6 қарашада аяқталды, тендерді «BiGlobal» ЖШС жеңіп алды. Компания нысанның құрылыс алаңы 15 мың шаршы метрден асады және 3600 адамға арналған үш қатар болады деп уәде береді. Жоба 16 айда аяқталады деп жоспарлануда.
Естеріңізге сала кетейік, ақпан айында Астанадағы Қажымұқан Мұңайтпасов атындағы ескі стадионды бұзу туралы шешім қабылданған болатын. Техникалық зерттеу стадион трибуналарының құлаудың аз-ақ алдында тұрғанын көрсетті.
