ARTLine Kazakhstan командасы үшін осы демалыс күндері Испанияның Андалусия аймағындағы Circuito de Jerez de la Frontera автодромында өткен финалдық жарыс уикенді шын мәнінде керемет болды. Қазақстандық спортшылар қатарынан үшінші кезеңде еуропалық трассаларда ең жылдам деп танылды.
Финалдық кезеңге дейін Шота Абхазава (№75) Lamborghini Cup санатында алдыңғы бес кезеңнің нәтижелері бойынша көш бастап, 10 жарыстың 5-еуінде жеңіске жеткен еді. Ал Егор Оруджев (№57) PRO санатындағы аралық хаттама бойынша үшінші орында тұрды, оның еншісінде маусымдағы екі жеңіс бар.
Бейсенбі күні жарыс екі спортшымыз – Шота Абхазава мен Егор Оруджевтің квалификациялық жарыста жеңіп алған екі поул-позициясынан басталды. Бұл олардың екі жарыста да алғашқы старттық орыннан бастайтынын білдірді.
Финалдық кезең, өз алдына жеке бір іс-шара ретінде өтетіндіктен, жарыстар бөлек ұйымдастырылып, әрбір жарысқа тек екі санат қатысады. Бұл спортшылар үшін тиімді болды, себебі олар негізінен тікелей бәсекелестерімен ғана жарысады.
Алғашқы жарыс LC және AM санаттары арасында өтті, оған біздің бельгиялық легионеріміз Найджел Байли қатысты. Шота Абхазава таңертеңгі поул-позицияны сенімді түрде жеңіске жеткізіп, жақын қарсыласынан 10 секундтан астам айырмашылықпен озды (сақина тәрізді жарыстарда мұндай айырмашылық үлкен жетістік саналады, себебі секундтың мыңнан бір бөлігі маңызды рөл атқарады). Бұл ағымдағы маусымдағы қатарынан алтыншы жеңісі болды!
PRO және PRO-AM санаттарының жарысы күрделі ауа райы жағдайында өтті – қатты жаңбыр мен нашар көріну көптеген апаттардың себебі болды, жарыстың басым бөлігі қауіпсіздік көлігі режимінде өтті. Егор Оруджев қарсыластарына қайта басталған жарыстарда да жақындауға мүмкіндік бермеді. Жарыстың аяқталуына бес минут қалғанда, жарыс тоқтатылып, испан автодромында тағы да Қазақстанның әнұраны шырқалды – бұл жолы Егор Оруджевтің жеңісінің құрметіне!
Жұма күні жарыс кестесіне өзгеріс енгізілді, ал жарыс күнін PRO және PRO-AM санаттарының екінші жарысы ашты. Егор Оруджев поул-позициядан таза түрде бастап, қарсыластарына еш мүмкіндік қалдырмады. Жарыстың барлық 50 минутында Егор сенімді басымдылықпен көш бастап, мәрелік жалауды бірінші болып көрді. Бұл оның маусымдағы төртінші жеңісі!
LC және AM санаттарының финалдық жарысын Шота Абхазава өте сенімді түрде бастан-аяқ өткізді. Ол 27 айналымды артта қалдырып, әр айналым сайын қарсыластарынан ұзай түсті және чемпиондық атаққа жақындай берді. Нәтижесінде, ол абсолюттік есепте жүлдегерлер үштігіне еніп, санаттағы жетінші жеңісіне қол жеткізіп, еуропалық серия тарихына LC санатының чемпионы ретінде енді!
Шота өзінің сұхбатында бұл маусымның фантастикалық болғанын, ауа райының түрлі тосын сыйлары мен Ле-Мандағы жарыстың тоқтатылуына қарамастан, серияға қатысу үлкен қуаныш сыйлағанын атап өтті. Ол бүкіл команданы бірінші кезеңнен бастап финалдық кезеңге дейінгі керемет жұмысы үшін алғысын білдірді.
Шынында да, команданың мінсіз жұмысын атап өтпеу мүмкін емес.Команда жарыс техникасын тамаша дайындап, пит-стоптарды қателіктерсіз өткізді. Бұл ARTLine Kazakhstan спортшыларына жарыстарда көшбасшылық позицияларын сақтап, 2024 маусымын салтанатты түрде аяқтауға мүмкіндік берді.
Финалдық кезеңде екі жеңісті дубль жасалып, төрт мәрте Circuito de Jerez de la Frontera трассасында Қазақстанның әнұраны шырқалды!
Ал бесінші рет Қазақстанның әнұраны 17 қараша, жексенбі күні Lamborghini Super Trofeo World Final әлемдік финалының екінші жарысында шырқалды. Егор Оруджев 2024 маусымын жеңіспен аяқтады.
Әлемдік финал — Lamborghini Super Trofeo-ның үш сериясының: Солтүстік Америкалық, Еуропалық және Азиялық финалы. 2024 жылғы финалға үш құрлықтан 67 қатысушы жиналды.
PRO және PRO-AM санаттарының әлемдік финалындағы алғашқы жарыста Егор төртінші орын алды. Бірақ екінші жарыста, еуропалық серияның көшбасшысы Амри Бондюэльдің артынан бастау алған Егор қарсыласын қыспаққа алу тактикасын таңдады. ARTLine Kazakhstan командасының механиктері пит-стоптар кезінде тағы да керемет жұмыс істегеннен кейін, Егор Амриден озып, жарыс пен әлемдік финалда лайықты жеңіске жетті! Егор Оруджев (ARTLine Kazakhstan) – Lamborghini Super Trofeo World Final жеңімпазы!
Команда туралы
ARTLine – 1998 жылы құрылған жарыс командасы. Сол жылы құрылған ARTLine Engineering конструкторлық бюросы спорттық техника, оның ішінде халықаралық деңгейдегі «Формула-3» жарыс машиналарын ArtTech брендімен жобалап, шығарады. 25 жылдық жұмыс барысында бюро 20-дан астам жарыс көлігін жобалап, 30-дан астамын құрастырды, олардың 17-сі – халықаралық деңгейдегі машиналар. Команда әлемнің 9 жарыс сериясына қатысты.
Команданы құрған Шота Мерабұлы Абхазава – қазақстандық кәсіпкер, мұнай-газ нарығына көлік және сервистік қызметтер көрсететін TEXOL компаниясының басшысы. Компания – Қазақстандағы газ және басқа да жүктерді тасымалдауға арналған ең ірі цистерна паркі мен теміржол вагондарының иесі.
Шота Абхазава 2015 жылы Lamborghini Super Trofeo Europe беделді моно-кузовтық сериясының AM санатында чемпион атанды, ал 2019 жылы PRO-AM санатында жеңіске жетті. 2023 жылдың қарашасында Италияның Валлелунга автодромында Lamborghini Super Trofeo 2023 әлемдік финалында жеңімпаз болды.
Команда құрамында тағы екі спортшы бар: Егор Оруджев пен Найджел Байли.
Егор Оруджев – амбициясы жоғары жас спортшы. Ол Eurocup Formula Renault 2.0, World Series by Renault 3.5, Formula V8 3.5 жарыстарында 2016 жылы қола жүлдегер атанып, European Le Mans Series LMP2 және FIA World Endurance Championship сияқты беделді жарыстарда Pro Cup санатындағы кәсіби жарыстарға қатысып, Еуропа жарыс аренасында танымал болды.
Найджел Байли (Nigel Bailly) – мүмкіндігі шектеулі бельгиялық спортшы. Ол AM Cup санатында ARTLine командасының атынан өнер көрсетеді. 2022 жылы Найджел әлемдегі ең маңызды GT3 жарыстарының бірі – Спа-Франкоршамда (Бельгия) 24 сағаттық төзімділік жарысына қатысты. Ал 2023 жылдан бастап толықтай қолмен басқарылатын көлікпен Lamborghini Super Trofeo чемпионатында өнер көрсетіп келеді.
Жарыс туралы
Lamborghini Super Trofeo – Lamborghini Squadra Corse компаниясы ұйымдастырған халықаралық чемпионат. Ол 3 континенттік сериядан тұрады: Еуропа, Азия және Солтүстік Америка. Серияның форматы – әлемнің ең престижді трассаларында әрқайсысының ұзақтығы 50 минут болатын екі жарыстан тұратын 6 кезеңнен қалыптасады, және бұл жарыстар әлемдік финалмен аяқталады, онда чемпиондар анықталады.
Lamborghini Super Trofeo жарысшылары идентикалық Lamborghini Huracán Super Trofeo Evo көліктерінде жарысатын және санаттарға бөлінген: PRO Cup – кәсіби гоншылар, PRO-AM – кәсіби және әуесқойлардан құралған экипаждар, AM Cup – кәсіби емес гоншылар және Lamborghini Cup – 50+ жастан асқан қатысушылардың жеке есептегі жарысы.
2023 жылғы маусымның финалы Италияның Валлелунга автодромында рекордтық қатысушылар санымен өтті – 30 елден 82 спортшы қатысты.
2024 жылы Lamborghini Super Trofeo, әлемдегі ең жылдам бір маркалы трофей деп саналып, 16 жылдығын атап өтті.
Дереккөз: Texol компаниясының баспасөз қызметі
