18 қарашада өткен матчтардың қорытындысы бойынша футболдан 2024 жылғы Еуропа чемпионатының финалдық кезеңіне тағы үш команда жолдама алды. Олар Швейцария, Румыния және Нидерланды құрамалары. Топтық кезеңнің тоғызыншы турында Швейцария Косовомен тең түсті (1:1), Румыния Израильді (2:1), Голландия Ирландияны (1:0) жеңді.
Бұған дейін Франция, Бельгия, Португалия, Испания, Шотландия, Түркия, Аустрия, Англия, Венгрия, Словакия, Албания, Дания, сонымен қатар 2024 жылғы Еуропа чемпионатын қабылдаушы ел ретінде Германия құрамалары жолдама алған болатын.
Жақын күндері еуроның финалдық бөлігінде өнер көрсететін тағы бес қатысушы анықталады. Қалған жолдамалар 2022/2023 жылғы Ұлттар лигасының топтық кезеңінің қорытындысы бойынша іріктеуден өткен командалар арасында, яғни плей-офф ойындарының қорытындысы бойынша наурыз айында ойнатылады. Футболдан 17-ші Еуропа чемпионаты 2024 жылдың 14 маусымы мен 14 шілдесі аралығында өтеді. Турнирдің топтық кезеңінде 24 команда өнер көрсетеді.
Ал Қазақстан құрамасы іріктеудегі соңғы матчты өткізу үшін бүгін Словенияға ұшып келді. Қазақстан мен Словения арасындағы ойын 20 қарашадан 21 қарашаға қараған түні Люблянада өтеді. Бұл ойында Н тобындағы Еуро-2024 екінші жолдамасының жеңімпазы анықталады. Бұған дейін Дания құрамасы құрлық біріншілігіне мерзімінен бұрын жолдама алған болатын, ал бетпе-бет кездесуге дейін Словения құрамасының еншісінде 19 ұпай болды. Қазақстан құрамасының еншісінде 18 ұпай бар. Еуроға жолдама алу үшін Магомед Адиев шәкірттеріне тек жеңіс керек.
