17 жастағы Соня Жиенбаева Анталияда (Түркия) өткен ITF World Tennis Tour W15 турнирінің жеңімпазы атанды.
Финалда қазақстандық теннисші түркиялық Йорук Илайды (525 WTA) 7:6 (7:4), 6:4 есебімен ұтты. Чемпиондық жолында Соня мықты қарсыластарын, соның ішінде турнирдің бірінші ракеткасы ресейлік Александра Шубладзеден (524 WTA) басым түсті.
«Бүгін мен үшін маусымның ең маңызды күні болған шығар. Апта бойындағы барлық матчтар өте қиын болды. Мен психологиялық тұрғыдан мықты әрі сенімді бола алғаныма өте қуаныштымын. Баршаңызға қолдау көрсеткендеріңізге рахмет», — деді Жиенбаева.
Анталиядағы жетістік Соня Жиенбаева үшін ересектер турындағы алғашқы чемпиондық атақ болды. ITF Juniors рейтингінде қазақстандық 31-орында тұр және Түркиядағы жеңісінің арқасында ертең, 15 сәуірде WTA жаңартылған рейтингінде ересектер арасында ТОП 1000 теннисші қатарына енеді.
