Елена Рыбакина Мадридтегі турнирді жеңіспен бастады

Елена Рыбакина Германиядағы жеңісінен кейінгі алғашқы кездесуде жеңіске жетті.

Бүгін Қазақстанның бірінші ракеткасы Елена Рыбакина Мадридте (Испания) өтіп жатқан WTA 1000 – Mutua Madrid Open турниріндегі жарыс жолын бастады. Екінші айналымда Рыбакина италиялық Лусия Бронзеттимен ойнады. Кездесу 6:4, 6:3 есебімен қазақстандық теннисшінің жеңісімен аяқталды. Матч бір сағат 15 минутқа созылды.

Келесі айналымда Рыбакина Марта Костюк (Украина) – Майар Шериф (Египет) арасындағы кездесудің жеңімпазымен ойнайды.

Айта кетейік, жыл басынан бері Елена үш титулды жеңіп алды. Ол Брисбен (Австралия), Штутгарт (Германия) және Абу-Дабиде (БАӘ) өткен WTA 500 жарыстарының чемпионы атанды.