107-мәрте ұйымдастырылып жатқан италиялық Гранд Тур бүгін, 4 мамыр Венария Реаледен басталып, 26 мамырда Римде аяқталады.
Жарысқа 29 елдің спортшылары қатысады. Ең көп шабандоз италиялықтар — 43, француздар- 22 , бельгиялықтар — 14, немістер мен голландиялықтар — 12. Сонымен қатар жарыста қазақстандық шабандоздар да сынға түседі. Бірақ, Ресей, Беларусь және Украинадан, сондай-ақ ТМД-ның басқа елдерінен шабандоздар болмайды. «Джиро д’Италиядағы» ең жас велошабандоздар Джулио Пелицари мен Мадис Мишельс болмақ. Олардың жасы қазіргі таңда 20-да. Ал ең үлкені 41 жастағы Доменико Поцзовиво.
Айта кетейік, биылғы маусымның алғашқы Гранд туры – «Джиро д’Италияның» жүлде қорының жалпы сомасы 1 606 160 еуроны құрайды. Жарыс жолының жалпы ұзақтығы 3331,2 шақырым. Италиялық Гранд Тур Пьемонт аймағында басталады, онда алғашқы үш кезең, соның ішінде Оропадағы таулы аймақта аяқталатын бір кезең бар.
Пьемонттегі үш күннен кейін «Джиро д’Италия 2024» Лигурия мен Тосканаға жол тартады. Онда бір орташа биіктіктегі таулы кезең, жекелей уақытқа арналған жарыс және тауға көтерілумен аяқталатын тағы бір кезең өтеді. 6-кезең (Viareggio-Rapolano Terme) финалда 12 шақырымдық қиыршық тасты жолдарды қамтиды. Ол «Страде Бьянке» жарыс бағытының бір бөлігі болып табылады. Келесі күні, 7-кезеңде 37,2 шақырымдық жекелей уақытқа арналған жарыс (Фолиньо-Перуджа) жазық аймақта өтеді. 8-кезең Прати-ди-Тивода мәресіне жетпек. Алғашқы жарыс аптасы әдеттегідей Неапольде спринтерлік кезеңмен аяқталады.
Екінші апта Кузано Мутриден басталады. 14-15 кезеңдерді ұйымдастырушылар жекелей жарыс болады деп мәлімдеді. 15-кезең теңіз деңгейінен 5200 метр биіктікте орналасқан аймақта өтеді. Жарыс жиырма кезеңге дейін жалғасады. Ал 20-кезең 2010 жылы Винченцо Нибалидің жойқын шабуылымен есте қалған Монте-Граппаға көтерілумен, 175 шақырымнан кейін Римде аяқталады. Осылайша Рим тарихта алтыншы рет және екінші жыл қатарынан «Джиро д’Италия» финалын өткізеді.
«Астана» командасы спорт директорлары Александр Шефер, Стефано Занини, Джузеппе Мартинеллидің жетекшілігімен бүгін елорда уақытымен 14:00-де Алексей Луценко, Симоне Веласко, Хенок Мулюбырхан, Кристиан Скарони, Вадим Пронский, Лоренцо Фортунато, Давиде Баллерини, Макс Кантер Гранд-Турдың жарыс жолына шығады.
