Алматыдағы Балуан Шолақ атындағы спорт сарайында өткен бокс кешінің басты кездесуінде Жанқош Тұраровтың қарсыласы жапониялық Акихиро Кондо (37-11-2, 21 КО) болды.
33 жастағы қазақстандық Жанқош Тұраров (28-0, 20 КО) сәтті өнер көрсетті. Ол Акихиро Кондоны (37-12-2, 21 КО) жеңіп, бірден екі нұсқа бойынша әлем чемпионы атанды.
Жеңіліс көрмеген Тұраров Кондодан мықты болып шықты. 12 раундтан кейін төрешілердің бірауыздан шығарған шешіммен жеңіске жетті – 118:110, 120:108, 118:110. Осы табысының арқасында Жанқош IBO тұжырымы бойынша жартылай орта салмақтағы әлем чемпионы атағын сенімді қорғап, WBA Gold титулын да жеңіп алды.
38 жастағы Кондо Жапониядан тыс жерде бір ғана жекпе-жек өткізген. 2017 жылдың қарашасында ол IBF әлем титулына үміткер болды. Бірақ қазақстандық Сергей Липинецке (ол кезде Ресейдің атынан шыққан, 2022 жылдан бастап Қазақстан атынан шығады) жеңіліп қалды.
Айта кетейік, бұл жекпе-жек кешіне бокстан тағы бір қазақстандық әлем чемпионы Жәнібек Әлімханұлы (15-0, 10 КО) қатысты. Орта салмақта WBO және IBF тұжырымдары бойынша әлем чемпионы Жәнібек Әлімханұлы (15-0, 10 КО) жерлесі Жанқош Тұраровты (27-0, 20 КО) қолдауға келген.
Бокс кеші аясында барлығы 10 жекпе-жек өтті. Солардың бірі әйелдер арасында Балауса Муздиман (2-0) мен мысырлық Мариям Габриге (3-0, 2 КО) қарсы — 6 раунддық жекпе-жек. Дегенмен Балауса Мариям Габриді үшінші раундта нокаутқа түсірді. Осылайша Муздиман кәсіпқой бокстағы үшінші жеңісіне қол жеткізді.
