Швейцарияның Ньон қаласында әуесқой командалар арасындағы УЕФА Аймақтар кубогының жеребесі тартылды.
Әуесқойлар арасында ел чемпионы – Павлодар облысының «Ақбет» командасы турнирдің аралық кезеңіне қатысады. Жеребе тарту барысында 32 команда төрт-төрттен сегіз топқа бөлінді. Біздің команда 1-топқа түсті. Қарсыласымыз – Украина, Польша және Израиль чемпиондары.
Аралық раундтың матчтары 2024 жылы 6 желтоқсанға дейін өтуі қажет. Алты жеңімпаз 2025 жылдың маусым не шілде айының соңғы екі аптасына жоспарланған финалдық кезеңге жолдама алады. Турнирде ел намысын 2023 жылғы маусымда әуесқой командалар арасындағы ҚР Чемпионатының қорытындысы бойынша бірінші орын алған Павлодар облысының «Ақбет» командасы қорғайды.
Естеріңізге сала кетейік, 2023 жылғы маусымдағы әуесқой командалар арасындағы футболдан Қазақстан Республикасы чемпионатының финалы қазан айында өтті. Финалдық турнирге облыстық кезеңнен жеңімпаз атанған 10 команда қатысты. Жарыс Павлодар қаласының орталық стадионында өтті. Бірінші орынды – «Акбет» (Павлодар облысы) командасы,
2 орынды – «КСК» (Қостанай облысы), 3 орынды – «VODNIK» (Алматы облысы) командасы иеленді. Осылайша әуесқойлар арасындағы Қазақстан чемпионатының жеңімпазы 2024-25 маусымында өтетін УЕФА аймақтар кубогына қатысу құқығын иеленген болатын.
