7 және 9 сәуір күндері футзалдан Қазақстан құрамасы Өзбекстанмен екі жолдастық кездесу өткізеді. Жоспар бойынша ойындар Ташкентте (Өзбекстан) өтуі керек еді. Алайда Өзбекстан футбол қауымдастығының 2024 жылғы әлем чемпионатының дайындығына байланысты өтініші бойынша қос кездесу Тараз қаласындағы «Тараз Арена» спорт кешеніне ауыстырылды.
Ұлттық құраманың оқу-жаттығу жиыны 1 сәуірде Таразда басталады. 4 сәуір күні Қазақстан құрамасы Қырғызстанмен бақылау ойынын өткізеді. Тараптардың өзара келісімі бойынша ойын жабық өтеді.
Естеріңізге сала кетейік, Қазақстан құрамасы 2024 жылы Өзбекстанда өтетін футзалдан әлем чемпионатына мерзімінен бұрын жолдама алған болатын. 2021 жылы Қазақстан мен Өзбекстан құрамалары Астанада екі жолдастық кездесу өткізді. Бірінші ойын 3:1 есебімен алаң иелерінің жеңісімен аяқталса, екінші ойында 6:4 есебімен қонақтар жеңіске жетті.
Қазақстан еуропалық іріктеуден элиталық раундтағы алты кездесуде де жеңіске жеткен жалғыз команда атанды. Кака шәкірттері Нидерланды (2:0, 2:0), Әзербайжан (4:2, 3:2) және Румынияны (4:3, 2:0) екі рет ұтып, 18 ұпаймен А тобында бірінші орынға шықты. Әлем чемпионатының финалдық турнирі 2024 жылдың 14 қыркүйегі мен 6 қазаны аралығында Өзбекстанда өтеді.
Футзалдан Қазақстан құрамасы алдағы жолдастық кездесулерге қатысатын футболшылар тізімін жариялады. Өкінішке қарай құраманың көшбасшы шабуылшылары Біржан Оразов, Дәурен Тұрсағұлов және Дуглас жарақатына байланысты алда өтетін матчтарға қатыса алмайды.
