Токиода Жапония мен Қазақстан құрамалары арасындағы Билли Джин Кинг кубогының іріктеу матчына дайындық басталды.
Бұл әйелдер құрамалары арасындағы алтыншы кездесу болмақ. Кездесулер статистикасы бойынша Жапония 4-1 есебімен көш бастап тұр. Біздің команда тек 2017 жылы Астанада жеңіске жетті.
Токиода өтетін алдағы кездесулерге Елена Рыбакина қатыса алмайтындықтан көшбасшы рөлін тәжірибелі Юлия Путинцева алады. Бұл оның жапондарға қарсы төртінші ойыны болмақ. 10 жыл бұрын Қазақстан құрамасы сапында дебют жасаған Путинцева ұлттық құрама сапында жекелей сында ең көп жеңіске жеткен рекордшы. Юлияның еншісінде 18 жеңіс бар. Ол бұл көрсеткіш бойынша Ярослава Шведова мен Зарина Диясты басып озды (екеуіде де 14 жеңіс).
«Мен бірінші, екінші, үшінші нөмірлі болуға әрқашан дайынмын. Бастысы командаға жеңіс әкелу. Бізде сәтті өнер көрсетуге тамаша мүмкіндік бар. Тек сол мүмкіндіктерді пайдалану керек. Наомимен бірнеше рет ойнадым және оған қалай қарсы әрекет ету керектігін білемін. Бапкеріммен бірге оның биылғы соңғы матчтарда көрсеткен ойынын әрі қарай талдаймын», — деді Юлия Путинцева.
Естеріңізге сала кетейік, матчтар Қазақстан уақыты бойынша 12 сәуір (жұма) күні сағат 10:00-де, ал 13 сәуірде (сенбі) сағат 9:00-де басталады. Ойынның бірінші күні жекелей екі матч болады. Келесі күні екі жекелей және бір жұптық кездесу жоспарланған. Бұл текетірестің жеңімпазы командалық әлем чемпионатының финалдық кезеңіне жолдама алады.
