Astana Qazaqstan Team командасының көшбасшысы Алексей Луценко сырқатына байланысты «Джиро д’Италияның» тоғызыншы кезеңінде жарыс жолына шықпады.
Қазақстан чемпионының бірнеше күн бойы сырқаттан денсаулығы нашарлаған. Соған байланысты Италияда өтіп жатқан Гранд-турды мерзімінен бұрын аяқтауға мәжбүр болды.
«Өкінішке қарай, Алексей синусит пен фаринготрахеитке байланысты «Джиро д’Италиядағы» өнерін жалғастыра алмайды. Шешім бүгін таңертең оның қазіргі жағдайын соңғы тексеруден кейін қабылданды», — деді команда дәрігері Эмилио Магни.
Айта кетейік, елордалық велокоманданың қалған шабандоздары «Джиро д’Италия» веложарысының тоғызыншы кезеңінде жарыс жолына шықты. Кезеңнің ұзақтығы 214 шақырымды құрады. «Visma» командасынан голландиялық Олав Коей мәре сызығын бірінші болып кесті. «Lidl-Trek» өкілі италиялық Джонатан Милан екінші нәтиже көрсетті. «UAE Team Emirates» командасынан колумбиялық Себастьян Молано үздік үштікті толықтырды.
«Астана» командасының екі велошабандозы кезеңді сәтті аяқтап, үздік ондыққа енді: Давиде Баллерине тоғызыншы, Макс Кантер оныншы нәтиже көрсетті. Симоне Веласко – 13, Хенок Мулюбырхан – 39, Лоренцо Фортунато (Италия, Астана) – 54, Вадим Пронский – 66, Кристиан Скарони – 74-ші болып мәреге келді.
