Валентина Хальзова Олимпиада ойындарына жолдама алды

Валентина Хальзова 75 келі салмақта Парижде өтетін Олимпиада ойындарына лицензия алды. Қазақстандық боксшы шешуші кездесуде колумбиялық Ширлейдис Оросконы 5:0 есебімен ойсырата ұтты.

Енді әйелдер боксында Қазақстан құрамасының екі лицензиясы бар – біріншісін 57 келі салмақта Карина Ибрагимова иеленді. Ал бүгін құрама қоржыны тағы бір жолдамамен толықты.

Естеріңізге сала кетейік, бүгін кешкі сессияда қазақстандық боксшылар тағы екі жекпе-жек өткізеді. Назым Қызайбай Солтүстік Корея өкілі Су Хьян Канмен жұдырықтасады. Өз кезегінде Мұхаммедсабыр Базарбайұлы мен молдавалық боксшы Александру Паращив 63,5 келі салмақта бесінші Олимпиада лицензиясын сарапқа салады.