Испанияның «Атлетико Мадрид» футбол клубы Алматы қаласы маңынан академиясын ашатыны жайлы жаңалық бұған дейін де тараған. Бірақ қашан ашылатыны, қай жерден салынатыны айтылмады. Ал бізге мәлім болғандай «Атлетико Мадрид» академиясының құрылысы Талғар қаласындағы «Ақбұлақ» олимпиадалық орталығының базасында бой көтереді. Академия оқу-жаттығу корпусымен, алаңдармен, жаттығу залдарымен, оқу сыныптарымен, сондай-ақ оңалту орталығымен жабдықталатын болады.
«Атлетико Мадрид» клубымен арадағы келіссөздер мәресіне жетуге жақын. Испан клубының мектебі әлемдегі ең мықты академиялардың бірі. Алматыда ашылатын академияда «Атлетико» клубының және өзіміздің мамандар жұмыс істейді», — делінген Orda.kz тілшілеріне берген министрлік жауабында.
Іргетасы 1903 жылы қаланған «Атлетико Мадрид» Испания мен Еуропадағы ең атақты клубтардың бірі. Қазақстандық жас футболшылар «Атлетико» әдісі бойынша білім алып, грантқа және Испанияда жаттығу мүмкіндігіне ие болады. Сондай-ақ Академияда Испаниядан келген мамандар жұмыс жасайды.
