Сауд Арабиясының Аль-Наср және футболдан Португалия ұлттық құрамасының шабуылшысы Криштиану Роналду тағы бір әлемдік рекордтың авторы атанды.
Ол ұлттық құрамасына 2024 жылғы Еуропа чемпионатына дайындық аясында Ирландияны жеңуге көмектесті. Футболдан Португалия ұлттық құрамасы Авейру қаласында өткен жолдастық кездесуде Ирландияны тізе бүктірді. Кездесу 3:0 есебімен португалиялықтардың пайдасына аяқталды. Алғашқы болып Жоао Феликс (18-минут) есеп ашса, одан кейін Криштиану Роналду дубль (50-минут, 60-минут) жасады.
Халықаралық футбол тарихы мен статистикасы федерациясының мәліметі бойынша, Ирландияға қарсы кездесу португалиялық футболшының топ деңгейдегі 1226-шы кездесуі болды. Осылайша ол Бразилияның бұрынғы қақпашысы Рожерио Сениден озды.
Роналду Португалия, Англия, Испания, Италия және Сауд Арабиясы чемпионаттарында 698 матч, сондай-ақ осы елдердің кубок турнирлері мен Суперкубогында 101 ойын өткізген. Бұдан бөлек ол халықаралық клубтық турнирлерде 220 ойынға қатысып, ұлттық құрама сапында 207 матчта алаңға шыққан.
Алдағы 14 маусым мен 14 шілде аралығында Германияда өтетін Еурода Португалия құрамасы Түркия, Грузия және Чехия командаларымен F тобында өнер көрсетеді.
