Ангелина Лукас IBO титулын иеленді

Қазақстандық  бұрымды боксшы Ангелина Лукас (10-1, 5 КО) Бангкок қаласында (Тайланд) өткен бокс кешінде өнер көрсетіп, IBO нұсқасы бойынша әлем чемпионы атағы үшін жұдырықтасты.

Лукас аргентиналық Дебора Анахи Лопеспен (21-2-1, 1 КО) кездесті. Олар жеңіл салмақтағы бос IBO титулын сарапқа салды. Жекпе-жек екі минуттан он раундқа есептеліп, төрешілердің шешімімен қазақстандық боксшының жеңісімен аяқталды.

Осылайша Лукас кәсіби мансабындағы он бірінші жеңісіне қол жеткізіп, IBO нұсқасы бойынша әлем чемпионы атанды. Ал, Лопес кәсіпқой рингтегі үшінші мәрте жеңіліс тапты.

Бұған дейін қазақстандық боксшы WIBF және WBF нұсқалары бойынша белбеулерді жеңіп алған болатын.