Жапонияның коньки спорты федерациясы марапаттау рәсімінде ескі әнұранды пайдаланғаны үшін Қазақстан құрамасынан ресми түрде кешірім сұрады.
Оқиға былай болған. Жапонияның Хатинохе қаласында конькимен жүгіруден төрт құрлық чемпионатында қазақстандық Виталий Щиголев масс-стартта жеңіске жетті. Марапаттау рәсімінде ұйымдастырушылар Қазақстанның ескі әнұранын қосады. Осы жайттан кейін қазақстандық конькишілер одағы ISU мен турнирді ұйымдастыру комитетіне хабарласып, мән-жайды анықтауды сұрады.
«Жапония коньки спорты федерациясы жіберген қателік үшін Қазақстан конькишілер одағы мен Қазақстан құрамасынан шын жүректен кешірім сұрайды. Ерлер арасындағы масс-стартта Виталий Щиголев мырзаны марапаттау рәсімінде Қазақстанның ескі әнұраны орындалды. Белгілі болғандай, біздің дерекқорымызда сақталған ескірген жазба қолданылған. Біз мұқият болуымыз керек еді. Болашақта осындай қателікті болдырмау үшін біз Халықаралық коньки тебу одағына (ISU) жүйе құруды ұсынғымыз келеді», — делінген хабарламада.
Айта кетейік, Виталий Щиголевтен бөлек командалық спринтте еліміздің намысын Надежда Морозова, Дарья Важенина және Кристина Силаева қорғады. Қазақстандық спортшылар 1 минут 30.36 секунд нәтижесімен қола жүлдегер атанды. Сондай-ақ 1000 метрге конькимен жүгіруден 26 жастағы отандасымыз Надежда Морозова жүлдегерлер қатарына еніп, күміс медальға ие болды.
