Конференция Лигасы аясында «Астана»-«Челси» арасында өтетін матчқа билеттер жексенбі, 24 қарашада сатылымға шықты. Сол күні-ақ астаналық клуб билеттердің барлығының сатылып кеткенін хабарлады. Бірақ, бұл билеттерді сатудың бірінші кезеңі ғана болатын. Билет бағасы секторға байланысты 10мың және 40 мың теңгеден басталды.
««Астана» футбол клубы мен Қазақстан футбол федерациясының өткен еуропалық матчтарындағы тәжірибесін ескере отырып, УЕФА Ұлттар лигасы ойындары кезінде билеттер сатуды екі кезеңге бөліп жүзеге асыру шешімі қабылданды.
УЕФА Конференция лигасы матчының екінші кезеңі 2024 жылғы желтоқсан айында басталады. «Астана» футбол клубы алдағы матчқа жоғары қызығушылықтың болатынын түсініп, билеттерді теңдей тарату үшін барлық қажетті шараларды қабылдайды. Әр билет жеке аты-жөнімен тіркелетін болады, бұл билет қайта сатылған жағдайда қауіпсіздік мақсатында қажет», — деп жазды клубтың баспасөз қызметі.
Сайттағы трафиктің көп болуына байланысты веб-сайтта бір уақытта пайдаланушылар санын шектейтін виртуалды кезек пайда болды. Орташа күту уақыты 5-10 минутты құрады. Нәтижесінде бір-екі сағаттың ішінде барлық билеттер (бірінші кезең) сатылып кетті.
Билеттер сатылымының екінші кезеңі желтоқсан айында болады.
Конференция лигасы – Чемпиондар лигасы мен Еуропа лигасынан кейінгі үшінші Еуропа кубогы турнирі. 2024/2025 маусымынан бастап ол басқа еурокубоктар сияқты жаңа жүйе бойынша өтеді. Бірінші кезеңде командалар топтарға бөлінбейді. Әр түрлі командалармен алты матч (3 үйде, 3 қонақта) өткізеді. Плей-оффқа қатысушылар ойындардың қорытындысы бойынша анықталады.
Конференция лигасындағы командалардың нәтижелері:
Жалпы кезең басталғалы «Астана» 3 кездесу өткізіп, оның бірінде жеңіске жетіп, екі рет жеңіліс тапқан. Конференция лигасының 4-ші туры алдында қазақстандық команда 3 ұпаймен 25-орында келеді.
«Пафос» – «Астана» – 1:0;
«Нью-Сейнтс» — «Астана» — 2:0;
«Астана» – «Бачка-Топола» – 1:0;
«Астана» — «Витория» (матч 28 қарашада өтеді).
«Челси» 3 ойында 3 жеңіске жетті. 4-ші тур алдында лондондықтар Конференция лигасының турнирлік кестесінде бірінші орында және ең жақсы гол айырмасына ие (16:3).
«Челси» — «Ноа» — 8:0;
«Панатинайкос» – «Челси» – 1:4;
«Челси» — «Гент» — 4:2;
«Хайденхайм» — «Челси»(28 қараша).
«Челси» Англия Премьер-Лигасының алты дүркін чемпионы және Чемпиондар Лигасының екі дүркін жеңімпазы. Сондай-ақ УЕФА суперкубогын жәнеЕуропа лигасын екі рет жеңіп алды. Transfermarkt мәліметі бойынша «Челси» ойыншыларының жалпы құны 954 миллион еуро, ал «Астана» ойыншылары 9,55 миллион еуроға бағаланған.
