Екі ойын да «Астана Арена» стадионында өтеді. Аренаға кіру тегін.
Қазақстан құрамасының Ұлттар лигасындағы шешуші матчтарының өтетін орны белгілі болды. Ойындар УЕФА Ұлттар лигасы топтық кезеңі аясында өтеді деп жоспарланған. Қазақстан әйелдер құрамасы 1 және 5 желтоқсан күндері УЕФА Ұлттар лигасының топтық кезеңінің қорытынды матчтарында Эстония және Армениямен кездеседі. Бүгін құрама футболшылары алдағы ойындарға қызу дайындықты бастап кетті.
Эстонияға қарсы матч 1 желтоқсанда Астана уақытымен 20:00-де өтеді. Артынша 5 желтоқсанда Арменияға қарсы матч жоспарланған. Ойынның басталуы – 21:00-де.
Естеріңізге сала кетейік, төрт турдан кейін Қазақстан құрамасы 5 ұпаймен үшінші орында келе жатыр. Бұған дейін Мадияр Кембіловтің шәкірттері Эстония (0:0), Армения (2:1) және Израильге (0:2, 0:0) қарсы ойнады.
С лигасындағы бес топтың жеңімпаздары В лигасына өтеді. Екінші орын алған үш үздік команда В лигасында үшінші орын алған үш үздік командамен өтпелі ойындар өткізеді. Жеңімпаздар Еуропа іріктеу кезеңінде В лигасында ойнайды. Ал ұтылғандары С лигасының ойындарына қатысады.
