Әлеуметтік желідегі танымал X The Tennis Letter аккаунты қазақстандық теннисші Елена Рыбакинаның WTA 2023 жылғы маусымында қол жеткізген керемет жетістігін атап өтті.
Биылғы маусымда Рыбакина әлемдік рейтингтің көшбасшысы саналатын қарсыласын төрт рет жеңіп үлгерді. 2023 жылы бұл атақты польшалық Ига Швентек пен белорусь Арина Соболенка иеленді.
«Елена Рыбакина 2023 жылы әлемнің бірінші ракеткаларын төрт рет жеңді. Бұл бір маусымдағы әлемдегі бірінші нөмірлі теннисшіні жеңген екінші көрсеткіш. Бұған дейін 1979 жылы тек Трейси Остин ғана алты мәрте жеңіске жеткен. Сенсация», — деп жазды ақпарат көзі.
Ал жаңа маусымды Елена Рыбакина Брисбенде (Аустралия) өтетін WTA-ның алдағы маусымындағы алғашқы Brisbane International турнирінен бастайды. Ұйымдастырушылардың баспасөз қызметінің хабарлауынша, аталмыш турнирге Рыбакинамен қатар Арина Соболенко, Наоми Осаки (Жапония), Виктория Азаренко (Беларусь) бақ сынайды.
Ал ерлер арасында ATP турының жаңа жұлдызы, 21 жастағы америкалық Бен Шелтон (әлемнің 17-ракеткасы), сондай-ақ Энди Маррей (Ұлыбритания), Хольгер Руне (Дания) және Григор Димитров (Болгария) қатысатынын растады.
Brisbane International 2023 жылдың 31-желтоқсаны мен 2024 жылдың 7-қаңтары аралығында өтеді. Брисбендегі әйелдер турнирі жоғары санатқа ие — WTA 500, ал ерлер турнирі ATP 250 дәрежесіне ие.
