Екі дүркін әлем чемпионы, қазақстандық Назым Қызайбай Испанияның Ла Нусия қаласында өтіп жатқан бокстан Boxam Elite-2024 халықаралық турниріндегі алғашқы жекпе-жегін өткізді.
50 келіге дейінгі салмақта 1/4 финалда Назым португалиялық Рита Соарешпен кездесіп, төрешілердің бірауыздан шығарған шешімімен (5:0) жеңіске жетті. Осылайша, қазақстандық былғары қолғап шебері турнирдің жартылай финалына шығып, кем дегенде қола жүлдеден үміткер атанды.
Тағы бір қазақстандық боксшы Айдана Забынбекова (60 келі) 1/8 финалда филиппиндік Риза Пасуитті 4:1 есебімен жеңіп, келесі кезеңге жолдама алды.
Айта кетейік, қазақстандық боскшы қыздар Boxam Elite-2024 турнирінде кем дегенде жеті медальдан үміткер: Әйгерім Сатыбаева (48 келі), Жазира Урақбаева (52 келі), Мәдина Нұршаева (70 келі) және Гүлсая Ержан (75 келі) жарыстағы жолдарын жартылай финалдан бастайды.
Тағы үш қазақстандық Аида Әбікеева (63 келі), Фариза Шолтай (81 келі) және Ләззат Күнгейбаева (+81 келі) бірден финалда өнер көрсетеді.
