Иран астанасы Тегеранда өтіп жатқан жабық кешендегі XI Азия чемпионатында Ұлттық құрама қоржыны тағы 3 медальмен толықты. 18-ақпан күні қазақстандық спортшы Елизавета Матвеева биіктікке секіруде 1.86 метрді бағындырып, чемпион атанды.
Ал 60 метрге жүгіруде Ольга Сафронова (7.35 секунд) мәреге 2-болып жетті. Ол былтыр Астанада өткен Азия чемпионатында осы қашықтықта күміс жүлдегер атанған. Сондай-ақ үш қарғып секіру сайысында Мария Ефремова (13.48 метр) қола жүлдеге ие болды.
Айта кетейік, жарыстың алғашқы күні, яғни 17-ақпан күні Қазақстан құрамасының қоржынына 3 жүлде түсті. 60 метрге кедергілермен жүгіруде Давид Ефремов 7,60 секунд уақыт көрсеткішімен чемпион атанды. Осылайша, Давид былтыр Астанда өткен сары құрлық чемпионатындағы атағын қорғап қалды.
Ядро лақтыру сайысында Иван Иванов 19,08 метр нәтижесімен күміс медаль иеленді. Ал 1500 метрге жүгіруде Аяна Болатбекқызы 4:37.20 уақытпен үздік үштікті түйіндеді.
Жалпы есепте Қазақстан құрамасында 2 алтын, 2 күміс, 2 қола медаль бар. Биылғы құрлық додасына еліміздің атынан 29 атлет қатысуда. Бүгін жарыстың соңғы күні.
