Әлемнің 23-ракеткасы Александр Бублик жартылай финалда әлемнің 5-ракеткасы, ресейлік Андрей Рублевпен кездесті. Бірінші партияда ресейлік теннисші тай-брейкте алға шықты -7:6 (7:4).
Екіншісінде Бублик есепті теңестірді — 7:6 (7:5). Үшінші, шешуші сетте есеп Бубликтің пайдасына 6:5 болғанда Рублев қапталдағы төрешіні балағаттаны үшін жеңіс қазақстандыққа берілді. Екі жарым сағатқа созылған тартысты кездесуде Бублик 21 эйс жасап, 4 брейк-пойнттың үшеуін пайдаланды.
Александр Бублик финалда әлемнің 4-ракеткасы, ресейлік Даниил Медведев немесе рейтингіде 18-орындағы франциялық Уго Умбердің біреуімен чемпиондық атақты сарапқа салады.
Екінші жартылай финалда әлемнің төртінші ракеткасы, ресейлік Даниил Медведев әлемнің 18-ракеткасы, 25 жастағы франциялық Уго Умберге қарсы ойнап, екі сетте 5:7, 3:6 есебімен сенсациялық жеңіліс тапты. Кездесу бір сағат 51 минутқа созылды. Енді турнирдің финалында француз теннисшісі Қазақстанның бірінші ракеткасы Александр Бубликпен чемпиондық атақты сарапқа салады. Турнир аяқталысымен АТР жаңартылған рейтингінде қазақстандық теннисші спорттық мансабында алғаш рет Топ-20 қатарына енеді. Тіпті, Бублик финалда жеңіске жеткен жағдайда әлемнің 15-ракеткасы атануы бек мүмкін.
