Дмитрий бразилиялық Даниэль Дутра Да Сильвамен бірге финалда жарыстың 2-ракеткалары, корт иелері Луис Бритто – Пауло Андре Сарайва Дос Сантоспен чемпиондық атақты сарапқа салды. Қазақстандық-бразилиялық жұп 6:3, 6:4 есебімен басым түсіп, чемпиондық атаққа қол жеткізді.
Сонымен қатар Попко жекелей сында да өнер көрсетіп, аргентиналық Хуан Пабло Фиковичпен чемпиондық атақты сарапқа салды. Бірінші партияда аргентиналық спортшының мерейі үстем болды — 6:4. Есесіне екіншісінде Попко тай-брейкте қарымта қайырды — 7:6 (7:4). Бірақ шешуші, үшінші сетте шамасы жетпеді — 3:6. Осылайша Дмитрий Попконың 23 матчқа созылған жеңіс сериясы аяқталды.
Қазақстандық теннисшілер халықаралық жарыстарда өнер көрсетуін одан әрі жалғастыруда. Тағы бір қазақстандық теннисші Юлия Путинцева Индиан-Уэллс (АҚШ) WTA 1000 турнирінің төртінші айналымына жолдама алды. Ол үшінші айналымда әлемнің 20-ракеткасы, америкалық Мэдисон Кизді тізе бүктірді. Путинцева екі сетте де жеңісті қолдан бермеді – 6:4, 6:1. Енді Юлия Путинцева ширек финалға шығу үшін әлемнің 1-ракеткасы, Польша өкілі Ига Швентекпен кездеседі.
Өкінішке қарай жекелей сында Қазақстанның бірінші ракеткасы, әлемдік рейтингте 20-шы орында тұрған Александр Бублик Индиан-Уэллс қаласында (АҚШ) өтіп жатқан ATP 1000 турнирінің 1/8 финалына өте алмады.
Бублик 1/16 финалда әлемнің оныншы ракеткасы аустралиялық Алекс Де Минаурдан жеңіліп қалды. Бірінші сетте отандасымыз тартысты жекпе-жекте 5:7 есебімен жеңіліп, тіпті екінші сетте қарсыласына толықтай басымдықты берді — 0:6. Осылайша Индиан-Уэллсте Қазақстанның тек бір өкілі ғана қалды.
