Бүгін боксшыларымыз үшін маңызды күн. Жеті қазақстандық былғары қолғап шебері Париж Олимпиадасының жолдамасы үшін шаршы алаңға шығады.
10-наурыз күні лицензиялық турнирде 71 келіде әлем чемпионы, ұлттық құраманың капитаны Асланбек Шымбергенов 1/8 финалда Байрамдурды Нұрмұхаммедовті (Түркіменстан) 3:2 есебімен жеңді.
Әлем чемпионы Махмұд Сабырхан 57 келідегі кезекті жекпе-жегінде Жосуе Тирадоны (Пуэрто-Рико) 5:0 есебімен жеңді. Ал 80 келіде тағы бір әлем чемпионы Нұрбек Оралбай 2021 жылғы әлем чемпионатының күміс жүлдегері Алексей Алферовты 3:2 есебімен жеңді. Алғашқы раундта Нұрбек 2:3 есебімен жол бергенімен, екінші раундта дәл соққыларының арқасында тараз басын өзіне бұрды. Ал шешуші раундта жерлесіміз қарымта шабуылдарға иек артып, жеңісті есеп сақтап қалды.
51 келіде әлем чемпионы Сәкен Бибосынов 1/8 финалда Бахрейн намысын қорғайтын отандасымыз Азат Махметовті 4:1 есебімен ұтты.
Алуа Балқыбекова 1\8-финалда Оңтүстік Корея елінің өкілі Джухюнг Чонмен кездесіп, қарсыласына әбжыландай атылып, әр соққысын дәл дарыту арқылы жеңіске жетті. Қорытынды есеп 4:1.
Италияның Бусто-Арсицио қаласында өтіп жатқан бокстан Әлемдік лицензиялық турнирдің бүгін тоғызыншы күні. Ширек финалда Олимпиада лицензиясы сарапқа салынады.
Күндізгі сессияда Қазақстан атынан рингке шығатын боксшылар:
17:30 — 92 кг. Айбек Оралбай — Джамар Туллы (АҚШ);
19:30 — 75 кг. Валентина Хальзова — Синди Нгамба (Ұлыбритания).
Кешкі сессия:
23:00 — 50 кг. Алуа Балқыбекова – Карина Макси Клетцер (Германия);
00:00 — 51 кг. Сәкен Бибосынов – Сиаран Макдональд (Ұлыбритания);
00:30 — 57 кг. Махмуд Сабырхан — Асрор Вохидов (Тәжікстан);
00:45 — 71 кг. Асланбек Шымбергенов – Сархан Әлиев (Әзербайжан);
01:30 — 80 кг. Нұрбек Оралбай — Келин Кэссиди (Ирландия).
